Gjermania ka nevojë për emigrantë: mungesë serioze punonjësish të kualifikuar

Edhe pas reformave të fundit në legjislacionin për migrimin e fuqisë punëtore, Gjermania po përballet me sfida të mëdha për të plotësuar boshllëqet në tregun e punës. Një studim i Fondacionit Bertelsmann paralajmëron se fuqia punëtore e vendit mund të zvogëlohet me 10% deri në vitin 2040, nëse nuk sigurohet një rritje e konsiderueshme e emigracionit.

Sipas studimit, Gjermania ka nevojë për të paktën 288.000 punonjës të huaj të kualifikuar çdo vit deri në vitin 2040, për të mbajtur një nivel të qëndrueshëm të fuqisë punëtore. Në mungesë të këtij fluksi, numri i punonjësve në vend do të bjerë nga 46.4 milionë sot, në 41.9 milionë në vitin 2040 dhe deri në 35.1 milionë në vitin 2060.

Një faktor i rëndësishëm që ndikon në këtë trend është dalja nga tregu i punës e gjeneratës së “baby boomer”, ndërsa popullsia vendase nuk mund të kompensojë këtë rënie. Ekspertja e migrimit Susanne Schultz thekson se, edhe pse potenciali i brendshëm duhet të zhvillohet, ky nuk është i mjaftueshëm. “Ky ndryshim demografik kërkon imigrim të qëndrueshëm,” shprehet ajo.

Reformat dhe sfidat

Në vitin 2023, Gjermania miratoi një ligj të ri për migrimin, i cili synonte të thjeshtonte procedurat dhe të bënte vendin më tërheqës për punonjësit e huaj të kualifikuar. Megjithatë, sipas ekspertëve, këto reforma nuk janë të mjaftueshme nëse nuk shoqërohen me një “kulturë mikpritëse” nga autoritetet dhe punëdhënësit, si dhe me mundësi reale për qëndrime afatgjata.

Një shembull domethënës është historia e një refugjati sirian, i cili arriti në Gjermani në vitin 2016, kreu studimet universitare në IT, por u largua për në Zvicër për shkak të ndjesisë së diskriminimit dhe mungesës së mundësive. “Unë dua të trajtohem si i barabartë, por nuk do të lyp për këtë,” tha ai.

Efekti në rajonet gjermane

Ndikimi i rënies së fuqisë punëtore do të jetë i pabarabartë në rajone të ndryshme. Landet lindore dhe ato më pak të populluara, si Turingia dhe Saksoni-Anhalt, pritet të jenë më të prekura, ndërsa qytetet e mëdha si Berlini dhe Hamburgu, falë migrimit më të lartë, do të ndihen më pak të goditura.

Gjermania duhet të balancojë reformat e politikave të migrimit me përmirësimin e kushteve për integrimin dhe barazinë, në mënyrë që të sigurojë fuqinë punëtore të nevojshme për zhvillimin e saj ekonomik dhe social. DW